Япониянинг Асахиково перефектурасидан Хоразмга келин бўлиб тушган Микако Сугавара ижтимоий тармоқларда ёритилган мақолалар орқали кўпчиликка яхши таниш. Бу ҳақда  «Xabar.uz» сайтида ҳам салмоқлигина мақола эълон қилинган эди. Ўтган қисқа вақт ичида хорижлик келиннинг ҳаёти ранг-баранг воқеаларга бой тарзда кечди.

Микако ўз она тили ва ўзбекчадан ташқари инглизчани ҳам мукаммал билади. Минтақада сайёҳликни ривожлантиришда унга ўхшаш кадрлар жуда зарур. Шу сабаб Хоразм вилоят туризмни ривожлантириш департаменти Микакога иш таклиф қилди. Бунинг учун у Хивага кўчиб ўтишга тўғри келади (япониялик келин оиласи билан Қўшкўпир туманида яшайди). Бу таклиф Микако-кеннойига жуда маъқул, бироқ айни пайтда қўлидаги чақалоғи бор. Шу боис таклифга розилик беришга шошмайроқ турибди.

Департамент масъуллари уни Хива шаҳрида уй билан таъминлаши мумкинлигини ҳам таъкидламоқда.

Яна бир янгилик. Микако Сугаваран яқинда «Миллий тикланиш» партияси аъзолигига қабул қилинди. Яқинда бўлиб ўтган «Ўзбекистон — умумий уйимиз» фестивали доирасида унга  аъзолик билети тантанали равишда топширилди.

Э.Бахт