Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

Нурбек Алимов

Оз нарсани қурбон қилган одам, оз нарсага эришади. Кўп нарсани хоҳлаган одам эса кўпроқ нарсадан воз кечиши кераклигини билади.

«Группага одам қўш ва пул ишла»

«Группага одам қўш ва пул ишла»

Фото: vestivrn.ru

Дўстлар, ҳозирги пайтда интернет фирибгарлар болалаб, урчиб кетган. Бугун сизларга шундай бир схема ҳақида гапириб бермоқчиман, дўстларингиз ва яқинларингизга ҳам улашинг, айниқса, ёши катта инсонларга.

Хуллас, ҳозир «Группага одам қўш ва пул ишла» деган усул бор, кўпчилик кўрган бўлса керак. Аслида бу ғирт фирибгарлар томонидан ишлатиладиган енгил схема. Сиз группага одам қўшасиз ва бироз ўтиб сизга «Группа Админ» дегани ёзади. «Сиз группага одам қўшганингиз учун фалон сумма ютиб олдингиз, карта рақамингизни юборинг» дейди. Карта рақамдан кейин картангизни амал қилиш муддатини ҳам сўрайди (энг қизиғи пул ўтказиш учун бу муддат умуман керак эмас) ундан кейин эса, сиздан телефонингизга келган кодни сўрайди. Агар мана шу кодни ҳам берсангиз тамом, ҳисобингизда бор пуллар билан хайрлашаверинг.

Қуйидаги расмда реал вазият акс этган, фирибгарнинг гапини қаранг: «инновацион янги лойиҳа» эмуш. Бир укамиз ҳам бир пасда карта рақамини ташлаб бергани ҳам кулгили.

Нима қилиш керак?

Биринчи навбатда, шундай хат келса, уни ёзган одамнинг профилига киринг, расмлари бўлса сақлаб олинг, телефон рақами чиқса (реалликдан йироқ) сақлаб олинг, никнеймини ҳам. Кейин жавоб беришдан олдин ўйланг, қандай танловда қатнашган эдим деб. «Одам қўш ва пулли бўл» каби лойиҳалар абсолют фарс. ФИРИБГАР! Ҳеч қачон пластик карта рақамингизни ҳам ва айниқса, картангизга уланган телефон рақамига келадиган кодни берманг!

Бундан ташқари, мен фалонча пул топдим сиз ҳам шундай бой бўлишни хоҳлайсизми деб бошланган ҳар қандай реклама ва видеолар бу – фирибгарлардир. Ҳеч ким ўзини гуллаб яшнаётган бизнесини биров билан бўлишмайди. Лақма бўлманг!

Ўйлашингиз мумкин, буни биламан мен деб. Лекин билмаганлар кўплиги ва шу фирибгарлар одамларнинг пулларини реал ўғирлашаётгани боис ҳам кўпайиб кетишди охирги вақтларда.

Демак, лақмалар бор, табиийки уларни чув туширадиган фирибгарлар топилади. Бу нарсада банкларнинг асло айби йўқ. Ҳамма айб сизнинг ўзингизда бўлади. Бундай жирканч инсонларни жойи эса, албатта, қамоқда. Ҳуқуқни муҳофаза қилувчи органлар шуларга нисбатан янада кучли кураш олиб боришади, деган умиддамиз. Аммо сен ҳам зийрак бўл, дўстим. Ўз пулингни ўзинг асра!

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг