Хабарлар тезкор Телеграм каналимизда Обуна бўлиш ×

Ўзсаноатқурилишбанк: йил сарҳисоби ва истиқболли режалар

Ўзсаноатқурилишбанк: йил сарҳисоби ва истиқболли режалар

Жорий йилнинг 16 январь куни “Ўзсаноатқурилишбанк” АТБ Бошқарувининг 2020 йил якунлари ва 2021 йилга мўлжалланган устувор вазифалари муҳокамасига бағишланган йиғилиши бўлиб ўтди. 

Йиғилишда дастлаб Ўзбекистон Республикаси Президентининг 2020 йил 29 декабрдаги Олий Мажлисга Мурожаатномасида келтириб ўтилган вазифаларга тўхталиниб, унда банк тизимига доир масалалар чуқур ўрганилди.

Айниқса, “Маҳаллабай” ишлаш тизими юзасидан 11-16 январь кунлари Ўзбекистон Республикаси Марказий банкида ўтказилган ўқув-амалий семинар натижаларини ҳудудий филиаллар ўртасида кенг тарғиб қилиш ҳамда мазкур тизим бўйича ишларни тизимли йўлга қўйиш лозимлиги таъкидланди.

Йиғилиш давомида Бошқарув аъзолари томонидан Банкнинг жорий йилга мўлжалланган стратегик режаси муҳокама қилиниб, Мурожаатномада келтирилган соҳага оид вазифаларга мувофиқлаштирилди.

Шундан сўнг йиғилиш кун тартибига кўра, Банкнинг 2020 йил якунлари бўйича фаолияти сарҳисоб қилинди.

Ҳисобот даврида Банк активлари 49 трлн. сўмни, кредит портфели 39,9 трлн. сўмни, жами депозитлар 11,4 трлн. сўмни ҳамда  умумий капитали 6,7 трлн. сўмни ташкил этди.

2020 йил давомида банк томонидан жами 978 та лойиҳа, шундан ҳудудларни ривожлантириш дастурларига асосан 966 та лойиҳа молиялаштирилди.

Шаҳрисабз туманидаги “Шаҳрисабз текстиль” МЧЖнинг йилига 5,8 минг тонна синтетик тола ва мато ишлаб чиқариш, Фарғона шаҳридаги “Уз-сеганг” қўшма корхонасининг йиллик қуввати 5,8 минг тонна қишлоқ хўжалиги маҳсулотларини етиштириш, Сардоба туманидаги “Сардоба оқсарой текстиль” МЧЖнинг йилига тайёр ҳолдаги 1,4 млн. дона маҳсулот ва 900 минг тонна мато ишлаб чиқариш қувватига эга лойиҳалари шулар жумласидандир.

Йиғилишда Банк томонидан коронавирус пандемияси оқибатларини юмшатиш борасида кўрилган чора-тадбирларнинг ҳам ҳисоботи тингланди.

Унга мувофиқ, пандемия сабабли қийин аҳволга тушиб қолган 1235 нафар тадбиркорни қўллаб-қувватлаш учун 4 трлн. сўм, 91 та экспортёрга 2,6 трлн. сўм кредит ажратилгани, 3 809 та мижознинг 2,9 трлн. сўмлик кредитлари муддати 6 ойга узайтирилгани айтиб ўтилди.

132 та экспортёрларга айланма маблағларни тўлдириш учун 3,6 трлн. сўм молиялаштирилди.

Халқаро молия корпорацияси кўмагида Ўзбекистонда биринчи бўлиб яшил лойиҳаларни молиялаштириш механизми йўлга қўйилди, 31,9 млн. долларлик 17 та ана шундай лойиҳа молиялаштирилди.

“SQB consult” компанияси билан ҳамкорликда барча ҳудудларда молиявий саводхонликни ошириш мақсадида ўқув курслари ташкил этилди. Бугунги кунда компания тадбиркорларга бизнес режа ишлаб чиқиш, мол-мулкни баҳолаш, импорт шартномасини экспертиза қилишда ёрдам кўрсатмоқда.

Бундан ташқари, Халқаро молия корпорацияси ҳамда Европа тикланиш ва тараққиёт банки экспертлари кўмагидаги Банкни трансформация қилишнинг 2-босқич ишлари якунига кўра, Халқаро стандартлар асосида корпоратив бошқарув ва риск менежмент тизими такомиллаштирилди, Кенгаш таркибига банк-молия соҳасида халқаро тажрибага эга 4 нафар мустақил аъзо киритилди, Корпоратив бошқарув хизмати жорий қилиниб, Кенгаш таркибида 5 та янги қўмита ташкил этилди.

Мижозларга йўналтирилган Банкнинг янги ташкилий тузилмаси жорий қилиниб, халқаро тажрибалар асосида ташкилий тузилма 5 та блокка ажратилди.

Ҳар бир бизнес йўналишларида мижозбай хизмат кўрсатувчи универсал ходимлар тайёрланди (RM).

Мижозларни тезкор кредитлаш мақсадида тадбиркорлар учун 26 турдаги, йирик корхоналарга 8 турдаги ва аҳоли учун 22 турдаги модулли кредитлар жорий қилинди. Натижада 630 млрд. сўм миқдорида 2197 та модулли кредитлар ажратилди.

Тадбиркорлар ва аҳолини кредитлашда инсон омили иштирок этмайдиган янги скоринг тизимига асосланган Андеррайтинг йўлга қўйилди. Аввалги 5 поғонали кредитлаш тизими 2 поғоналига туширилди (2,5 трлн. сўм миқдорида 1964 та кредит маъқулланди).

Молиявий режалаштириш ишларини автоматлаштириш йўналишида Германиянинг SAP компанияси дастури асосида молиявий прогнозлаштириш тизими ишга туширилди.

CERT халқаро стандартлаштириш ташкилоти билан ҳамкорликда “антикоррупция” тизими йўлга қўйилди.

Чакана бизнес йўналишида ишлаётган барча ходимларни KPI тизими асосида рағбатлантирилиши амалга татбиқ қилинди.

Рақамли банк хизматларини кўрсатиш йўлида аҳоли учун мутлақо янги 58 та хизмат турини ўз ичига олган “JOYDA” мобил иловаси ишга туширилди. Илова билан биргаликда хизмат ва товарларни истеъмол кредити ҳисобига масофадан сотиб олиш имконини берувчи электрон савдо майдончаси (маркетплейс) ташкил этилди.

Банк хизматларини мижозларга яқинлаштириш мақсадида 42 та банк хизматлари офиси ва 89 та ўз-ўзига хизмат кўрсатиш маркази (24/7) ташкил этилди.

Йиғилишда Бошқарув аъзолари диққати Банкни 2021 йилда стратегик ривожлантириш бўйича белгиланган режаларга қаратилиб, унга баъзи ўзгартишлар киритилди.

2021 йилда Банк умумий активлари ҳажмини 52,2 трлн. сўмга, кредит портфелини 44,4 трлн. сўмга ҳамда юридик ва жисмоний шахсларнинг жами депозитлари қолдиғини 11 трлн. сўмга етказиш режалаштирилган.

Иқтисодиётни ривожлантириш, тадбиркорликни қўллаб-қувватлаш ҳамда истиқболли лойиҳаларни молиялаштириш мақсадида жами 488 та лойиҳага 8,3 трлн. сўм кредитлар ажратилиши белгиланди.

Жумладан, 16 та йирик лойиҳага 3,3 трлн. сўм, ҳудудларни ривожлантириш дастурлари доирасидаги 283 та лойиҳага 4,1 трлн. сўм, бошқа йўналишлардаги лойиҳалар (189 та) учун эса 900 млрд. сўм ҳажмида кредит маблағлари ажратилади.

Йиғилиш якунида кун тартибидаги масалалар бўйича тегишли қарорлар қабул қилинди.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг