Ижтимоий тармоқларда Туронбанк Россиянинг «Мир» карталаридан воз кечгани ҳақида хабарлар тарқалди.

Мазкур хабарларни текшириш асносида айни вақтда Туронбанк расмий сайтидан «Мир» карталари бўлими олиб ташлангани кузатилди.

Хабарларда айтилишича, мазкур банкда кеча соат 17:00ларга қадар «Uzcard-Мир» карталарини 36 минг сўм эвазига очиш мумкин бўлган, аммо айни дамда бу хизмат тури банк сайтидан олиб ташланган.

Эслатиб ўтамиз, жорий йил 15 сентябрь куни АҚШ Молия Вазирлиги томонидан Россиянинг «Мир» карталари билан ишлайдиган банкларга санкция эълон қилиниши мумкинлиги ҳақидаги хабарлар ортидан Қозоғистон, Туркия, Вьетнам каби давлатларнинг бир нечта банклари «Мир»  карталари билан ишлашни тўхтатгани ҳақида маълум қилганди.

Қайд этилишича, Ўзбекистоннинг бешта банки – Халқ банки, Микрокредитбанк, Қишлоқ қурилиш банк, Туронбанк ҳамда Алоқабанклар «Мир» карталарини эмиссия қилади.

Ўз навбатида Uzcard процессинг маркази Ўзбекистонда «Мир» тўлов карталари жорий этган банклар номидан Россиянинг ТАСС агентлигига ҳисобот бериб, мазкур карталарга хизмат кўрсатиш Ўзбекистон банкларида ҳеч қандай чекловларсиз давом этаётганини билдирган.

«Ҳозирда Ўзбекистон банкларида «Мир» карталарига ҳеч қандай чекловларсиз хизмат кўрсатилмоқда», – дейилади хабарда. 

Ягона умумреспублика процессинг маркази (UZCARD тўлов тизими)нинг ушбу масала юзасидан рус ОАВсига ҳисоботи айрим иқтисодий-таҳлилчиларда «шунчаки процессинг маркази қандай қилиб банкларнинг ички сиёсатига аралашиши мумкин» деган саволни туғдирмоқда.  

«Uzcard банкларнинг бизнес сиёсатига аралашмайди, у шунчаки процессинг маркази. Унинг Ўзбекистонда «Мир» тўлов карталари жорий этган банклар номидан гапириши – бу нотўғри», – дейишмоқда улар.