Ижтимоий тармоқларда қашқадарёлик С.Муқимованинг «Ўғлимни ўлдирганлар кўпчилик бўлса-да, лекин бир кишининг бўйнига қўйишмоқчи» мазмунидаги мурожаати тарқаганди. Бош прокуратура матбуот хизмати раҳбари Ҳаёт Шамсутдиновга кўра, ушбу мурожаат тегишли тартибда ўрганиб чиқилди.  

Аввало, мурожаат мазмуни ҳақида. Унда она 30 яшар ўғли Ж.Хушбоқовни бир неча шахс вахшийларча ўлдиргани, битта гумонланувчи Россияга қочириб юборилгани, унинг паспорти олиб қўйилмагани, қон таҳлилида бошқа одамнинг қони чиққани, экспертиза хулосасига кўра, қон таҳлилида фарзандидан ташқари яна уч кишининг қони борлиги, улар орасида ўғлини уйидан олиб чиқиб кетган боланинг қони йўқлиги (бу бола воситачи бўлиб), ўғлини ўлдирганлар бошқа эканлигини айтиб, тергов ҳаракатлари нотўғри ўтказилганидан норозилик билдиради.

Воқеликка келсак. 2019 йилнинг 27 сентябрь куни (соат 18 лар чамаси) Яккабоғ туманининг «Алақарға» қишлоғидаги хусусий корхонасига қарашли ошхона рўпарасидан Ж.Хушбоқов бош қисмининг энса соҳасида ўткир санчиб кирувчи жисм билан етказилган тан жароҳати билан хушсиз ҳолатда топилган.

Мазкур ҳолат юзасидан ўша куннинг ўзида Жиноят кодексининг тегишли моддаси билан жиноят иши қўзғатилган.

Жабрланувчи, орадан икки кун ўтиб, кўрсатилган тиббий муолажаларга қарамай шифохонада вафот этган.

Судга оид тиббий экспертизаси Ж.Хушбоқов «орттирилган калла миянинг очиқ шикастланиб, бош миянинг оғир даражали лат ейиши, бош мия тўқимасига ва мия қоринчаларига қон қуйилиши, ўнг чакка пешона суякларининг ботиб синиши» каби жароҳатларнинг кечиши жараёнида ривожланган ўткир юрак қон-томир етишмовчилиги натижасида вафот этгани ҳақида хулоса беради.

Тўпланган тергов ҳужжатларига кўра, ушбу жиноятни олдиндан бўлган келишмовчилик туфайли Ш.Сафаров содир этганлиги аниқланган.

Тергов натижасига кўра, Ш.Сафаровга ЖКнинг 97-моддаси 1-қисми (қасддан одам ўлдириш) билан айблов эълон қилиниб (қамоқ эҳтиёт чораси қўлланган), жиноят иши 31.12.2019 йилда айблов хулосаси билан ЖИБ Чироқчи тумани судига юборилган.

Жиноят иши ҳозирда судда кўрилмоқда.

Алоҳида таъкид шартки, инсон ҳаётига тажовуз қилиш — фавқулодда ҳолат ҳисобланиб, воқелик аниқланган пайтдаёқ бу ҳақда шахсан Бош прокурор хабардор этилади. Бу эса бундай оғир жиноят алоҳида назоратга олинишини англатади. Мурожаат қилган аёлни инсон сифатида тушунамиз, фарзандни йўқотиш оғир мусибат. Бироқ оғир жиноятлар бўйича, хусусан, қотиллик каби қилмишлар бўйича терговлар жиддий тарзда олиб борилади. Агар суд тергови давомида мазкур жиноят иши бўйича янги ҳолатлар аниқлангудек бўлса, қўшимча суриштирувлар ўтказилишига ҳеч қандай монелик йўқ.