Жиноят ишлари бўйича Булоқбоши туман судида хонадонида ижарада яшаётган аёлнинг уч ёшли фарзанди устидан қайноқ сув қуйиб, болани куйдирган эркакка ҳукм ўқилди. Бу ҳақда «Дарё» ёзмоқда.

2021 йилнинг 11 январь куни соат 02:00 да З.Б. уйида спиртли ичимлик истеъмол қилиб, маст ҳолда хонадонида ижарада яшаб келаётган Г. исмли аёлга жинсий алоқа қилишни таклиф қилган. Аёл ушбу таклифни рад этгани учун печка устида қайнаб турган сувни олиб, унинг ёнида ётган 3 ёшли Д.нинг устига қуйиб, унга оғир тан жароҳати етказган.

Маълум бўлишича, судланувчи хонадонида яшовчи аёл билан 2020 йилнинг декабрь ойида танишган ва шундан сўнг телефон орқали гаплашиб юрган. 2021 йил 6 январь куни аёл судланувчига қўнғироқ қилиб, ижарада яшаётган уйидан ҳайдаб юборилганини, борадиган манзили йўқлигини айтиб, ижарага жой сўраган. Таниши унинг илтимосига рози бўлиб, ижарага ойлик тўлов тўламасдан, фақат электр ва табиий газ истеъмоли учун ҳар ойда 300 минг сўмдан бериб туриши лозимлигини билдирган. Шундан сўнг Г. фарзанди билан танишиникига келиб, яшай бошлаган. Судланувчининг онаси соғлиғи ёмонлашгани туфайли даволаниш мақсадида опасиникига кетган, у эса бундан фойдаланиб уйидаги таниш аёлга эр-хотин бўлишни таклиф қилган. Г. унга рад жавобини бериб, касал эканлигини билдирганидан кейин ўз хонасига кириб кетган.

Ярим тунда эркак танишига боласи кўп йиғлаб шовқин кўтаргани, ўзи ҳам ҳар куни соат 03:00—04:00 ларга қадар телефонида гаплашиб, уйқу бермаётгани учун бошқа ижарага уй топиб чиқиб кетишини айтган. Бироқ таниши бир кун уйида туриб туришини, кейин ижарага уй топиб, олиб чиқиб кетишини айтган.

Суд ҳукмига кўра, айбланувчи Жиноят кодексининг 104-моддаси 3-қисми «д» банди (қасддан баданга оғир шикаст етказиш жабрланувчининг ўлишига сабаб бўлса) билан айбли деб топилиб, 8 йил муддатга озодликдан маҳрум қилинди.