«PSA Group» («Peugeot-Citroen») ва «Fiat Chrysler Automobiles» (FCA) бирлашиши ҳақида хабар бергандик. Бугун берилган хабарга кўра, компаниялар бирлашиши бўйича барча расмиятчиликлар ниҳоясига етказилган. Бу ҳақда бирлашган компания — «Stellantis» ўз пресс-релизида маълум қилди.

«Stellantis NV» («Stellantis») компанияси тузилишига олиб келувчи «Peugeot SA» ва «Fiat Chrysler Automobiles» бирлашиши ниҳоясига етказилди», — дейилади хабарда.

«Stellantis» акциялари Euronext (Париж), Mercato Telematico Azionario (Милан) биржаларида бугун, 18 январдан сотувга чиқарилди, эртага, 19 январдан Нью-Йорк фонд биржасида ҳам пайдо бўлади.

Маълумот учун: 1899 йили асос солинган «Fiat» компанияси «Fiat», «Lancia», «Alfa Romeo», «Abarth», «Ferrari» ва «Maserati» брендлари остида автомобиллар ишлаб чиқарган. «PSA» (илгариги номи — «PSA Peugeot-Citroen») — Европада «Volkswagen AG» сўнг иккинчи йирик автомобилсоз. Компания «Peugeot» томонидан «Citroen» акцияларининг 90 фоизи сотиб олинганидан сўнг 1976 йилда шаклланган.